Monday, 25 June 2012

CPP គ្រប់គ្រង​ឃុំ-សង្កាត់​១៥៩២​ក្នុង​ចំណោម​១៦៣៣

http://www.postkhmer.com/index.php?option=com_content&view=article&id=80736:cpp--&catid=1:national-news&Itemid=76


ពល​រដ្ឋ​​ខ្លះ​រក​ឈ្មោះ​របស់​ខ្លួន​មិន​ឃើញ នៅ​ក្នុង​ការ​បោះ​ឆ្នោត​ឃុំ​ សង្កាត់​កាល​ពី​ថ្ងៃ​ទី ៣ មិថុនា​​​។ រូបថត ហេង ជី​វ័ន​

25 June 2012 វង្ស សុខេង

ភ្នំពេញៈ គណបក្ស​ប្រជាជន​កម្ពុជា​ ដែល​ជា​គណបក្ស​កាន់​អំណាច​ បាន​គ្រប់គ្រង​ជា​ផ្លូវ​ការ​ លើ​ឃុំ​សង្កាត់​ចំនួន ១៥៩២ ក្នុង​ចំណោម​ឃុំ​ សង្កាត់​សរុប ១៦៣៣ បន្ទាប់​ពី​ការ​បោះឆ្នោត​ឃុំ​សង្កាត់​ថ្ងៃ​ទី ០៣ ខែ​មិថុនា កន្លង​ទៅ​។ លទ្ធផល ​នេះ ​ក៏​បាន​ព្យាករ​ផង​ដែរ​ថា គណបក្ស​ប្រជាជន នឹង​គ្រប់គ្រង​អាសនៈ​ភាគ​ច្រើន​នៃ​អាសនៈ​សរុប ១២៣ ក្នុង​រដ្ឋ​សភា​នៅ​ក្នុង​ការ​បោះឆ្នោត​ជាតិ​នៅ​ថ្ងៃ​ទី ២៨ ខែ​កក្កដា ឆ្នាំ​ក្រោយ​នេះ។

លោក ទេព នីថា​ អគ្គ​លេខាធិការ​នៃ​គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) បាន​ថ្លែង​ថា លទ្ធផល​ជា​ផ្លូវ​ការ នៃ​ការ​បោះឆ្នោត​ឃុំ​សង្កាត់ បាន​ប្រកាស​នៅ​ថ្ងៃ​អាទិត្យ ម្សិលមិញ ដែល​ក្នុង​នោះ គណបក្ស​ប្រជាជន​ឈ្នះ ៨២៩២ អាសនៈ នៃ​អាសនៈ​សរុប​១១៤៥៩​អាសនៈ ក្នុង​ឃុំ​សង្កាត់​ចំនួន ១៦៣៣។ លោក​បន្ត​ថា គណបក្ស សម រង្ស៊ី ដែល​ជា​គណបក្ស​ប្រឆាំង បាន​ឈ្នះ​ ២១៥៥ អាសនៈ កាន់កាប់​តំណែង​មេ​ឃុំ​ ចៅសង្កាត់​ ចំនួន ២២ ​គណបក្ស​សិទិ្ធមនុស្ស យក​បាន​អាសនៈ​៨០០ អាសនៈ និង​កាន់​តំណែង​មេ​ឃុំ ឬ​ចៅ​សង្កាត់ ១៨ គណបក្ស​ហ៊្វុនស៊ិនប៉ិច ឈ្នះ ១៥១ អាសនៈ កាន់​តំណែង​មេ​ឃុំ​ ឬ​ចៅ​សង្កាត់ ១ គណបក្ស​នរោត្តម រណឫទ្ធិ ឈ្នះ ៥២ អាសនៈ គណបក្ស​សម្ព័ន្ធ​ប្រជាធិបតេយ្យ​ឈ្នះ ៨ អាសនៈ និង​គណបក្ស​ជាតិ​ខ្មែរ​ឈ្នះ ១ អាសនៈ​។

លោក ទេព នីថា បាន​បន្ថែម​ថា៖«បរិស្ថាន​បោះឆ្នោត​ជា​ទូទៅ បាន​ប្រព្រឹត្ត​ទៅ​ដោយ​រលូន ប៉ុន្តែ​មាន​ការ​រិះគន់​ជា​ធម្មតា ដោយ​គណបក្ស​ប្រឆាំង​ថា បោះឆ្នោត​មិន​សេរី និង​មិន​យុតិ្តធម៌​»។
លោក​បន្ថែម​ថា គ.ជ.ប នឹង​បញ្ជូន​បញ្ជី​ឈ្មោះ​បេក្ខជន របស់​គណបក្ស​ ទៅ​ក្រសួង​មហាផ្ទៃ នៅ​ថ្ងៃ​ចន្ទ ហើយ​បេក្ខជន​ទាំង​អស់​នឹង​ចូល​កាន់​តំណែង​ក្នុង​ឃុំ សង្កាត់​រយៈ​ពេល ១៤ ថ្ងៃ បន្ទាប់​ពី​ក្រសួង​ទទួល​បាន​បញ្ជី​ឈ្មោះ​បេក្ខជន​នោះ។ លោក​បន្ត​ថា៖ «​មាន​តែ​ក្រសួង​មហា​ផ្ទៃ​ទេ ដែល​នឹង​តែង​តាំង​បេក្ខជន​ទាំង​នោះ​ ពី​គណបក្ស​នយោបាយ ឲ្យ​ទទួល​ការងារ​នៅ​ឃុំ​ សង្កាត់​។ វា​ផុត​ពី​ដៃ គ.ជ.ប ហើយ​»។

គណបក្ស​សិទិ្ធ​មនុស្ស បាន​ចេញ​សេចក្តី​ថ្លែងការណ៍​មួយ កាល​ពី​ម្សិលមិញ ដោយ​បញ្ជាក់​ជា​ថ្មី​ម្តង​ទៀត​ថា ការ​បោះឆ្នោត​ជ្រើសរើស​ក្រុម​ប្រឹក្សា​ឃុំ សង្កាត់​អាណត្តិ​ទី ៣ នេះ មាន​ភាព​មិន​ប្រក្រតី​យ៉ាង​ធ្ងន់ធ្ងរ ដែល​ គ.ជ.ប ត្រូវ​តែ​ទទួល​ខុស​ត្រូវ​នោះ គឺ​យន្តការ និង​នីតិវិធី ធ្វើ​ឲ្យ​អ្នក​មាន​សិទ្ធិ​បោះឆ្នោត​មិន​អាច​បោះឆ្នោត​បាន ដែល​មាន​ចំនួន​យ៉ាង​ច្រើន​សន្ធឹក​សន្ធាប់ ដែល​នេះ ជា​ការ​រំលោភ​លើ​សិទ្ធិ​ពលរដ្ឋ និង​សិទ្ធិ​នយោបាយ​របស់​ប្រជាពលរដ្ឋ​ខ្មែរ​។ ​គណបក្ស​ប្រឆាំង​មួយ​នេះ​ បាន​សរសេរ​ក្នុង​សេចក្តី​ថ្លែង​ការណ៍​ថា៖ «​គណបក្ស​សិទិ្ធមនុស្ស យល់​ឃើញ​ថា ជ័យជម្នះ​របស់​គណបក្ស​កាន់​អំណាច ទទួល​បាន​ដោយ​ការ​បោះឆ្នោត ដែល​មាន​ភាព​មិន​ប្រក្រតី​យ៉ាង​ធ្ងន់ធ្ងរ ​ជា​ជ័យជម្នះ​មិន​ថ្លៃ​ថ្នូរ ដែល​មិន​ត្រឹម​តែ​ធ្វើ​ឲ្យ​ប៉ះពាល់ ដល់​កិត្តិយស​របស់​គណបក្ស​កាន់​អំណាច​ប៉ុណ្ណោះ​ទេ តែ​ធ្វើ​ឲ្យ​ប៉ះពាល់​ដល់​កិត្តិយស​របស់​ជាតិ​ខ្មែរ​ផង​ដែរ»។

ជាមួយ​គ្នា​នេះ​បក្ស​សិទ្ធិ​មនុស្ស​បាន​ទាមទារ​ឲ្យ​ធ្វើ​ការ​ផ្លាស់ ប្តូរ សមាសភាព​មេដឹកនាំ គ.ជ.ប ធ្វើ​បញ្ជី​បោះឆ្នោត​ជា​ថ្មី​ឡើង​វិញ លុប​ចោល​ទម្រង់​ផ្សេងៗ​ដែល​ជា​នីតិវិធី​ដ៏​ស្មុគស្មាញ​ នៃ​ការ​បោះឆ្នោត ហើយ​ គ.ជ.ប ត្រូវ​តែ​ធានា​ថា ប្រជា​ពលរដ្ឋ​ខ្មែរ​គ្រប់​រូប ដែល​មាន​សិទ្ធិ​បោះឆ្នោត ត្រូវ​តែ​អាច​បោះឆ្នោត​បាន​។

លោក យឹម សុវណ្ណ អ្នក​នាំ​ពាក្យ​គណបក្ស សម រង្ស៊ី មិន​អាច​ទាក់​ទង​សុំ​ការ​អត្ថាធិប្បាយ​បាន​ទេ​ពី​ម្សិលមិញ៕

No comments: