27 June 2012 វង្ស សុខេង និង ជាង សុខា
ភ្នំពេញៈ លោកនាយករដ្ឋមន្រ្តី ហ៊ុន សែន បានបដិសេធទៅនឹងការចុះផ្សាយដ៏ចម្រូងចម្រាស ដែលថា លោកបានចុះហត្ថលេខា ផ្តល់សម្បទានដីសេដ្ឋកិច្ច បន្ថែមទៀត ទៅឲ្យក្រុមហ៊ុនឯកជន នៅក្រោយពេលដែលលោក បានចេញបទបញ្ជាឲ្យផ្អាក កាលពីថ្ងៃទី ៧ ខែឧសភា។
ថ្លែងទៅកាន់យុវជនស្ម័គ្រចិត្តប្រមាណ ១០០០ នាក់ ដែលជ្រើសរើសដើម្បីចុះទៅវាស់វែងបែងចែកដីធ្លី ជូនប្រជាពលរដ្ឋ នៅតាមតំបន់ដែលមានជម្លោះដីធ្លី ជាមួយក្រុមហ៊ុនឯកជន លោកនាយករដ្ឋមន្រ្តី បានរិះគន់កាសែត ភ្នំពេញ ប៉ុស្តិ៍ និងកាសែត ឌឹ ខេមបូឌា ដេលី យ៉ាងខ្លាំងៗ ដោយលោកមានប្រសាសន៍ថា កាសែតទាំងពីរ សរសេរអត្ថបទព័ត៌មាន ដោយគ្មានមូលដ្ឋានច្បាប់។
លោក ហ៊ុន សែន បានបញ្ជាក់ថា៖ «ខ្ញុំគោរពសារព័ត៌មាន ក៏ប៉ុន្តែសារព័ត៌មានដែលខ្វះវិជ្ជាជីវៈ ឬក៏ខ្វះព័ត៌មានគ្រប់ជ្រុងជ្រោយ ឬក៏មានចេតនាបំផ្លិចបំផ្លាញ គួរត្រូវបានកែតម្រូវ បើមិនកែតម្រូវ យើងអាចមានបញ្ហាជាមួយគ្នា»។ លោកបានបន្ថែមថា៖ «ខ្ញុំចេះតែដាស់តឿន ដោយត្រូវមើលពីដើមដល់ចប់ កុំមើលមួយចំណុច ហើយមានចេត នាបំផ្លាញ»។ លោក ហ៊ុន សែន បញ្ជាក់ថា បទបញ្ជាលេខ ០១ របស់លោក ដែលមានបួនចំណុច លោកសូមលើកតែ ២ ចំណុចទេ ដែលជាប់ពាក់ព័ន្ធគ្នា ហើយចំណុចទី ១ ចែងច្បាស់ថា ផ្អាកបណ្តោះអាសន្ន ការផ្តល់ដីសម្បទានសេដ្ឋកិច្ច និងចំណុចទី ៤ ចែងច្បាស់ថា ចំពោះដីសម្បទានសេដ្ឋកិច្ច ដែលទទួលបានការអនុញ្ញាតជាគោលការណ៍ ពីរដ្ឋាភិបាលរួចហើយ មុនថ្ងៃចេញបទបញ្ជានេះ ត្រូវបន្តអនុវត្តតាមគោលការណ៍ច្បាប់ និងនីតិវិធីជាធរមាន។ លោកបន្ថែមថា ប្រសិនបើដីសម្បទានសេដ្ឋកិច្ច មិនទាន់កំណត់ជាដីឯកជនរបស់រដ្ឋនាយករដ្ឋមន្រ្តី ត្រូវចុះហត្ថលេខា លើអនុក្រឹត្យ និងមាននីតិវិធីជាច្រើនទៀត បន្ទាប់មកក្រុមហ៊ុន ត្រូវអនុវត្តសេចក្តីជូនដំណឹងរបស់រដ្ឋាភិបាល គឺត្រូវសហការជាមួយនឹងក្រសួងកសិកម្ម កំណត់ព្រំប្រទល់ ឬកាត់ដីចេញពីទំហំជាក់ស្តែង បើប៉ះពាល់ដីព្រៃ ត្រូវកាត់ចេញ បើប៉ះពាល់អ្នកភូមិ ត្រូវរក្សាដីឲ្យពួកគេ។
យោងតាមព្រះរាជក្រឹត្យថ្ងៃទី ១២ ខែមិថុនា និងថ្ងៃទី ១៥ ខែមិថុនា លោកនាយករដ្ឋមន្រ្តី បានចុះហត្ថលេខាលើអនុក្រឹត្យ ៩ នៅថ្ងៃទី ៧ ខែមិថុនា ដែលកំណត់ដីសាធារណៈរបស់រដ្ឋ ទៅជាដីឯកជនរបស់រដ្ឋ ក្នុងតំបន់អភិរក្សសត្វព្រៃ ដែលលោកនាយករដ្ឋមន្រ្តី អះអាងថា អនុក្រឹត្យទាំងនោះ ជាផ្នែកនៃនីតិវិធីច្បាប់ និងគោលការណ៍ដីសម្បទានសេដ្ឋកិច្ច ដែលបានអនុម័តជាគោលការណ៍រួចហើយ ដោយរដ្ឋាភិបាល។
លោកបន្តថា៖ «ត្រូវបំពេញនីតិវិធីឲ្យគេ [ម្ចាស់ដីសម្បទានសេដ្ឋកិច្ច] ក្នុងនីតិវិធីរាប់ទាំងអនុក្រឹត្យ អនុបយោគ។ [ប្រព័ន្ធផ្សព្វផ្សាយ] មើលច្បាប់ឲ្យគ្រប់គ្រាន់ ចាំនិយាយតាំងខ្លួនជាបណ្ឌិត»។
លោក ច័ន្ទ សារុន រដ្ឋមន្រ្តីក្រសួងកសិកម្ម បានប្រាប់ ភ្នំពេញ ប៉ុស្តិ៍ កាលពីម្សិលមិញថា តាមពិត នីតិវិធីអនុវត្ត នឹងត្រូវការរយៈពេលពី ២ ទៅ ៣ ខែ បន្ទាប់ពីរដ្ឋាភិបាល អនុម័តជាគោលការណ៍ ហើយក្រុមហ៊ុន ត្រូវធ្វើការឲ្យបានជិតស្និទ្ធ ជាមួយនឹងក្រសួងកសិកម្ម លើផែនការមេ និងយន្តការដទៃទៀត មុននឹងចុះហត្ថលេខា លើកិច្ចព្រមព្រៀងផ្លូវការ។
លោកបញ្ជាក់ថា៖ «ខ្ញុំគិតថា នេះជាការភ័ន្តច្រឡំ របស់ប្រព័ន្ធផ្សព្វផ្សាយ ដែលមិនយល់ដឹង ពីនីតិវិធី វាជាការងារបច្ចេកទេស។ ឥឡូវនេះ យើងកំពុងធ្វើការលើបញ្ហាបច្ចេកទេស ដល់ក្រុមហ៊ុនដទៃទៀត ដែលទទួលបានការអនុញ្ញាតជាគោលការណ៍ ប៉ុន្តែមិនទទួលបានការអនុញ្ញាតជាផ្លូវការពីប្រមុខរដ្ឋាភិបាល»។ បើតាមលោក ច័ន្ទ សារុន ក្រសួងកសិកម្ម បានផ្តល់ដីសម្បទានប្រហែល ១,២ លានហិកតា ដល់ក្រុមហ៊ុនឯកជន ១៧៦ ចាប់តាំងពីឆ្នាំ ១៩៩៥ មក ប៉ុន្តែក្រុមហ៊ុន ៥៨ ត្រូវបានលុបចោលដីសម្បទានសេដ្ឋកិច្ចដោយសាររំលោភលើកិច្ច ព្រមព្រៀង៕ TK
No comments:
Post a Comment