លោក ហ៊ុន ម៉ានិត (ស្តាំ)អមដំណើរឪពុកទៅប្រាសាទព្រះវិហារ។ រូបៈ ជីវ័ន
ភ្នំពេញៈ លោក ហ៊ុន ម៉ានិត នាយរងខុទ្ទកាល័យ និងជាកូនប្រុសទី២ របស់លោកនាយករដ្ឋមន្ត្រី ហ៊ុន សែន ត្រូវបានតែងតាំងជាអគ្គលេខាធិការរងនៃអគ្គលេខាធិការដ្ឋាន ជាតិដោះស្រាយទំនាស់ដីធ្លី បន្ថែមលើមុខងារបច្ចុប្បន្ន។ នេះបើយោងទៅតាមសៀវភៅព្រះ រាជកិច្ច ដែលបោះផ្សាយដោយទីស្តីការគណៈរដ្ឋមន្ត្រី ចុះថ្ងៃទី១៥ខែមិថុនា ឆ្នាំ២០១២។
យោងទៅតាមសៀវភៅព្រះរាជកិច្ចឲ្យដឹងថា លោកនាយករដ្ឋមន្ត្រី ហ៊ុន សែន បានចុះហត្ថលេខាលើអនុក្រឹត្យនៅថ្ងៃទី៧ ខែមិថុនា ឆ្នាំ២០១២ តែងតាំងលោក ហ៊ុន ម៉ានិត ជាអគ្គលេខាធិការរងនៃអគ្គអាជ្ញាធរជាតិដោះស្រាយទំនាស់ដីធ្លីបន្ថែម លើមុខងារ បច្ចុប្បន្ន។ នៅក្នុងមាត្រាទី២ បានចែងថា ៖ «អនុក្រឹត្យនេះមានប្រសិទ្ធភាពចាប់ពីថ្ងៃចុះហត្ថលេខាតទៅ» ។
កាលពីថ្ងៃទី១៣ ខែមករា ឆ្នាំ២០១២ លោកនាយករដ្ឋមន្ត្រី ហ៊ុន សែន បានចុះហត្ថលេខាលើអនុក្រឹត្យ សម្រេចដំឡើងឋានន្តរស័ក្ដិថ្នាក់ វរសេនីយ៍ឯក នាយទាហាននៃកងយោធពលខេមរភូមិន្ទ ជូនលោកវរសេនីយ៍ទោ ហ៊ុន ម៉ានិត ជានាយករង នាយកដ្ឋានស្រាវជ្រាវចារកិច្ចរបស់អគ្គបញ្ជាការដ្ឋាន។
លោក ហ៊ុន ម៉ានិត ដែលត្រូវបានតែងតាំងជាអគ្គលេខាធិការរងនៃអគ្គលេខាធិការដ្ឋាន អាជ្ញាធរជាតិដោះស្រាយទំនាស់ដីធ្លីនាពេលថ្មីៗនេះ បានបដិសេធមិនធ្វើអត្ថាធិប្បាយទេ កាលពីថ្ងៃពុធ ដោយបានមានប្រសាសន៍ថា «ខ្ញុំមិនអាចជឿថា ជាអ្នកកាសែតភ្នំពេញ ប៉ុស្តិ៍ទេ ព្រោះពុំមានអ្វីអាចបញ្ជាក់តាមទូរស័ព្ទបានថា ជាអ្នកយកព័ត៌មានរបស់ ភ្នំពេញ ប៉ុស្តិ៍» បើទោះជាលោកនិពន្ធនាយកបានឆ្លងឆ្លើយជាមួយតាមទូរស័ព្ទ ដើម្បីបញ្ជាក់ក៏ដោយ។
លោក យឹម សុវណ្ណ អ្នកនាំពាក្យគណបក្សសមរង្ស៊ី បានថ្លែងថា មានកូនខ្មែរជាច្រើនដែលមានបទពិសោធនិងមានសមត្ថភាពនៅក្នុងតួនាទី របស់រដ្ឋ ប៉ុន្តែ គួរឲ្យសោកស្តាយដែលពួកគេពុំមានឱកាសដោយសារតែប្រទេសនេះអ្វីៗ សម្រេចដោយបុគ្គលម្នាក់។ លោកថ្លែងថា៖ «ខ្ញុំសូមជូនពរចំពោះអ្នកដែលទទួលបានតំណែងថ្មីនោះធ្វើការ បម្រើប្រទេសជាតិ និងរកយុត្តិធម៌ជូនប្រជាពលរដ្ឋដែលរងគ្រោះដោយសារតែការពារដី ធ្លីតិចតួចរបស់ពួកគាត់»។
លោក អំ សំអាត អ្នកស៊ើបអង្កេតជាន់ខ្ពស់របស់អង្គការសិទ្ធិមនុស្សលីកាដូបានថ្លែង ដែរ ថា នេះគឺជាការតែងតាំងថ្មីរបស់រាជរដ្ឋាភិបាលទាក់ទិនទៅនឹងគោល នយោបាយដោះស្រាយដីធ្លីថ្មី ដែលរដ្ឋាភិបាលបានចាត់តាំងកម្លាំងយុវជនពិសេសចុះវាស់វែងដី ធ្លីជូនប្រជាពលរដ្ឋ។ លោកថ្លែងថា ៖ «យើងសង្ឃឹមថា លោកហ៊ុន ម៉ានិត នឹងដោះស្រាយបញ្ហាដីធ្លីមានប្រសិទ្ធភាព នោះគឺជាអ្វីដែលពលរដ្ឋចង់បាន»។
លោក ចាន់ សូវ៉េត មន្ត្រីស៊ើបអង្កេតជាន់ខ្ពស់នៃសមាគមសិទ្ធិមនុស្សអាដហុកបានថ្លែង ចាប់អារម្មណ៍នឹងការតែងតាំងលោកហ៊ុន ម៉ានិត ជាប្រធានដឹកនាំបេសកកម្មពិសេសយុវជនចុះទៅវាស់វែងដីជូនប្រជា ពលរដ្ឋថា ជាការល្អបំផុតដែលលោកនាយករដ្ឋមន្ត្រីបានឲ្យយុវជនទាំងអស់នោះ ធ្វើការវាស់វែងដីជូនប្រជាពលរដ្ឋ ដោយមិនឲ្យសួរថា បោះឆ្នោតឲ្យគណបក្សណា ប៉ុន្តែ អ្វីដែលគួរឲ្យបារម្ភនោះ គឺពួកគេស្លៀកពាក់ឯកសណ្ឋានកងទ័ព ប្រើស្លាកសញ្ញា ដែនដីនគរូបនីយកម្ម ដែលវាធ្វើឲ្យប្រជាជនមានការភ័យខ្លាច។ លោកបន្តថា៖ «យើងសង្ឃឹមថា លោកនឹងធ្វើការបានជោគជ័យ ហើយផ្តល់យុត្តិធម៌ដល់ពលរដ្ឋដែលរងគ្រោះនៅក្នុងជម្លោះកន្លងមក»៕
No comments:
Post a Comment