Facebook Inc នឹង​ប្រឈម​សម្ពាធ​កាន់​តែ​ខ្លាំង​ថែម​ទៀត

Tuesday, 21 August 2012

Bloomberg

 

 ក្រុង​មេនឡូផាកៈ ភាគ​ហ៊ុន​របស់​ក្រុម​ហ៊ុន Facebook Inc ដែល​បាន​ធ្លាក់​ចុះ​ដល់​តម្លៃ​ទាប​បំផុត​ បន្ទាប់​ពីអ្នក​ខាង​ក្នុង​ក្រុមហ៊ុន (insider) អាច​លក់​ភាគហ៊ុន​ជា​លើក​ទីមួយ ចាប់​ពី​ការ​បោះ​ផ្សាយ​ IPO ​មក​នោះ នឹង​ត្រូវ​ប្រឈម​នឹង​សម្ពាធ​កាន់​តែ​ខ្លាំង​ថែម​ទៀត នៅ​ពេល​ភាគ​ហ៊ុន​ចំនួន ១,៤៤​ពាន់​លាន​ហ៊ុន​ផ្សេង​ទៀត ត្រូវ​បាន​លក់​ចេញ​រហូត​ដល់​ខែ​វិច្ឆិកា។
កាល ​ពី​សប្តាហ៍​មុន ក្រុម​ហ៊ុន​ Facebook  បាន​លក់​ចេញ​ភាគហ៊ុន​ចំនួន ២៧១,១​លាន​ហ៊ុន ដែល​ជា​ការ​លក់​ចេញ​លើក​ដំបូង​ក្នុង​ចំណោម​ការ​រឹត​បន្តឹង​ការ​លក់​ចេញ​ ចំនួន ៥ ដែល​ត្រូវ​ធ្វើ​ក្នុង​អំឡុង​ឆ្នាំ​ទីមួយ​ក្នុង​នាម​ជា​ក្រុមហ៊ុន​សាធារណៈ។

ខណៈ ​លោក Mark Zuckerberg អគ្គនាយក​ក្រុម​ហ៊ុន Facebook  កំពុង​ប្រតិបត្តិការ​សេវា​បណ្តាញ​សង្គម​មួយ​នោះ ​លោក កំពុង​ប្រឈម​នឹង​ក្តី​បារម្ភ​របស់​ក្រុម​វិនិយោគិន​ថា​តើ​ក្រុម​ហ៊ុន​នេះ អាច​រក​ប្រាក់​ចំណូល​បន្ថែម​ដោយ​របៀប​ណាពី​មូលដ្ឋាន​កំណើន​អ្នក​ប្រើ​ប្រាស់ ​សេវា​សង្គម​នេះ​។ ក្តី​បារម្ភ​នោះ រួម​ទាំង​ការ​បញ្ចប់​រយៈ​ពេល​បម្រាម​លក់ភាគ​ហ៊ុន​ចេញ​ (lock-up) លើក​ទីមួយ បាន​ជំរុញ​ឲ្យ​តម្លៃ​ភាគ​ហ៊ុន​របស់​ក្រុម​ហ៊ុន​នេះ បាន​ធ្លាក់​ចុះពាក់​កណ្តាល​មក​នៅ​ត្រឹម ៣៨​ដុល្លារ​ និង​ធ្វើ​ឲ្យ​តម្លៃ​ទីផ្សារ​របស់​ក្រុមហ៊ុន​នេះ ធ្លាក់​ចុះ ៤៦​ពាន់​លាន​ដុល្លារ។ ​

លោក Herman Leung អ្នក​វិភាគ​ប្រចាំ​ក្រុម​ហ៊ុន Susquehanna International Group ថ្លែង​ថា​៖​ «​តើ​នេះ​គឺ​ជា​អ្វី​ដែល​គ្មាន​ភាព​អត់ធ្មត់ ឬ​ជា​អ្វី​ដែល​វិនិយោគិន​គួរ​តែ​ព្រួយបារម្ភ​? ត្រូវ​ហើយ តែ​ចំពោះ​ក្រុម​វិនិយោគិន​រយៈ​ពេល​វែង​វិញ ខ្ញុំ​យល់​ថា នេះ​គឺជា​ឱកាស​ដ៏​ល្អ​មួយ​ដើម្បី​ទិញ​ភាគហ៊ុន ដែល​មាន​តម្លៃ​ទាប​បែប​នេះ»៕ BP